მომსახურების პირობები

1. სერვისი

Merme ბიზნესს AI პროდუქტებს სთავაზობს: ამჟამად შეხვედრების ასისტენტს, რომელიც ონლაინ შეხვედრებს უერთდება, აკეთებს მათ ტრანსკრიფციას და ადგენს ჩანაწერებს, მომავალში კი სხვა პროდუქტებსაც, მათი გამოშვებისთანავე. ფუნქციები შეიძლება შეიცვალოს; არსებითი ცვლილებების შესახებ აპლიკაციაში გაცნობებთ.

2. ანგარიშები და სამუშაო სივრცეები

ავტორიზაციას გადიხართ Google-ის ან Microsoft-ის ანგარიშით. თუ კომპანიის ელფოსტით შედიხართ, უერთდებით ამ ელფოსტის დომენის სამუშაო სივრცეს: დომენიდან პირველი ავტორიზებული მომხმარებელი ქმნის მას და ხდება მისი ადმინისტრატორი და ბილინგის მფლობელი, ხოლო იმავე დომენის ელფოსტით მოგვიანებით შემოსული კოლეგები მას ავტომატურად უერთდებიან მნახველის როლით. თუ პირადი ელფოსტით შედიხართ (მაგალითად, gmail.com), გექმნებათ საკუთარი პირადი სამუშაო სივრცე. ადმინისტრატორს ასევე შეუძლია ნებისმიერი პირის მოწვევა სამუშაო სივრცეში ელფოსტის მისამართით.

ადმინისტრატორები იწვევენ წევრებს და აუქმებენ მათ წევრობას, ანიჭებენ როლებს და მართავენ სამუშაო სივრცის პარამეტრებს; მათ აქვთ ჰოსტის ყველა უფლებამოსილება და შეუძლიათ სამუშაო სივრცის ნებისმიერი ჩანაწერის ნახვა, გაზიარება და ექსპორტი. ჰოსტს შეუძლია, საკუთარ შეხვედრებზე Merme მოიწვიოს (ამაზე სამუშაო სივრცის საათები იხარჯება), და არის ამ შეხვედრების ჩანაწერების თანამფლობელი: შეუძლია მათი გაზიარება და ექსპორტი. მნახველი ეცნობა ჩანაწერებს, მაგრამ შეხვედრებზე Merme-ს ვერ მოიწვევს. ნებისმიერ წევრს, როლის მიუხედავად, შეუძლია ნახოს იმ შეხვედრების ჩანაწერები, რომლებზეც მოწვეული იყო, და მისთვის გაზიარებული ჩანაწერები, ასევე განაახლოს მასზე მინიჭებული დავალებები. ბილინგის მფლობელი (სამუშაო სივრცის შემქმნელი ან ადმინისტრატორი, რომელსაც მან ეს როლი გადასცა) ყიდულობს საათებს და ბილინგის საკითხებში საბოლოო გადაწყვეტილებას იღებს. თქვენ ხართ პასუხისმგებელი ყველა მოქმედებაზე, რომელიც თქვენი ანგარიშით ხორციელდება.

3. წინასწარ შეძენილი საათები

შეხვედრების ჩაწერის საფასური იფარება წინასწარ შეძენილი საათებით. საათები წამის სიზუსტით აღირიცხება იმ დროის მიხედვით, რასაც Merme-ს ბოტი ზარში ატარებს: შეერთების დაწყებიდან გასვლამდე, მოლოდინის ოთახში გატარებული დროის ჩათვლით (მაქსიმუმ 10 წუთი, თუ ბოტს არავინ შეუშვებს). ბოტი, რომლის შეერთებაც თავიდანვე ვერ ხერხდება (მაგალითად, არასწორი ბმულის გამო) ან რომელიც ჩვენი მხრიდან მომხდარი შეფერხების გამო ვერ ამუშავდება, საათებს არ ხარჯავს. საათების ამოწურვისას მიმდინარე შეხვედრა არ წყდება; ზედმეტად გამოყენებული დრო მომდევნო დამატებული საათებიდან გამოიქვითება. ყოველი ახალი სამუშაო სივრცე იღებს 5 უფასო საათს. პაკეტებს ყიდულობთ ერთჯერადად და ისინი არ არის გამოწერა. საათები სამუშაო სივრცეს ეკუთვნის და ვადა არ გასდის, თუმცა სამუშაო სივრცის წაშლისას დარჩენილი საათები იკარგება.

პაკეტები მოცემულია პროდუქტის გვერდზე. სანამ საქართველოს ბანკის დაცულ საგადახდო გვერდზე ონლაინ გადახდა ამოქმედდება, საათების შესაძენად მოგვწერეთ support@merme.ai-ზე: დაგიდასტურებთ ფასს ლარში (დღგ-ის ჩათვლით, ასეთის არსებობის შემთხვევაში), შევათანხმებთ გადახდის დეტალებს და თანხის მიღებისთანავე საათებს თქვენს სამუშაო სივრცეს დავამატებთ. გამოუყენებელი საათების თანხის დაბრუნება განიხილება ინდივიდუალურად. მოგვწერეთ support@merme.ai-ზე.

4. გამოყენების წესები

Merme შეგიძლიათ მოიწვიოთ მხოლოდ იმ შეხვედრებზე, რომელთა ჩაწერის უფლებაც გაქვთ. ნაგულისხმევად Merme ავტომატურად უერთდება თითოეული ჰოსტისა და ადმინისტრატორის დაკავშირებულ კალენდარში არსებულ ონლაინ შეხვედრებს. ბოტის შეერთება შეგიძლიათ გამორთოთ ცალკეული შეხვედრისთვის ან პარამეტრებში აირჩიოთ, რომ Merme მხოლოდ თქვენ მიერ დაშვებულ შეხვედრებს შეუერთდეს; ასე Merme თქვენი სახელით აღარ შეუერთდება, თუმცა იმავე შეხვედრის სხვა ჰოსტს ან ადმინისტრატორს მისი მოწვევა მაინც შეეძლება. თქვენ ხართ პასუხისმგებელი მონაწილეთა ინფორმირებაზე და ჩაწერისა და პერსონალურ მონაცემთა დაცვის იმ კანონმდებლობის მოთხოვნების შესრულებაზე, რომელიც თქვენზე ვრცელდება.

დაუშვებელია Merme-ს გამოყენება:

• პირთა ჩასაწერად მათი ინფორმირების გარეშე ან, სადაც კანონი ამას მოითხოვს, მათი თანხმობის გარეშე;
• იმ მონაცემთა დასამუშავებლად, რომელთა დამუშავების უფლებაც არ გაქვთ, ან განსაკუთრებული კატეგორიის პერსონალური მონაცემების (მაგალითად, ჯანმრთელობის მდგომარეობის შესახებ მონაცემების) მიზანმიმართულად დასამუშავებლად, რისთვისაც Merme არ არის განკუთვნილი;
• სერვისისა და მისი პროვაიდერების მუშაობაში ჩასარევად.

5. თქვენი კონტენტი

თქვენი შეხვედრები და ჩანაწერები თქვენი საკუთრებაა. მათ ვამუშავებთ მხოლოდ სერვისის მისაწოდებლად, კონფიდენციალურობის პოლიტიკის შესაბამისად, და არასდროს ვიყენებთ AI მოდელების დასასწავლად. ჩანაწერის ნახვის უფლების მქონე ნებისმიერ პირს შეუძლია მისი PDF-ად შენახვა, ხოლო ჩანაწერის მფლობელებსა და სამუშაო სივრცის ადმინისტრატორებს შეუძლიათ მისი Markdown ფორმატში ჩამოტვირთვაც. ცალკეული ჩანაწერის წაშლა აპლიკაციაში ჯერ შეუძლებელია: მის რომელიმე მფლობელს ან სამუშაო სივრცის ადმინისტრატორს შეუძლია მისი წაშლა მოითხოვოს support@merme.ai-ზე მოწერით, სამუშაო სივრცის წაშლისას კი მისი ყველა ჩანაწერი იშლება.

6. ხელმისაწვდომობა

ჩვენ ვცდილობთ, რომ Merme მაქსიმალურად საიმედო იყოს, თუმცა სერვისი მოწოდებულია პრინციპით „როგორც არის“ (as is): ბოტი შეიძლება ვერ შეუერთდეს შეხვედრას, პროვაიდერის სერვისი იყოს დროებით მიუწვდომელი, ან ტრანსკრიპტში იყოს ცდომილებები. კრიტიკულად მნიშვნელოვანი საკითხებისთვის ყოველთვის იქონიეთ საკუთარი ჩანაწერები. უწყვეტი ხელმისაწვდომობის გარანტიას ვერ გავცემთ.

7. პასუხისმგებლობის შეზღუდვა

კანონით დაშვებულ ფარგლებში Merme-ს სრული პასუხისმგებლობა სერვისთან დაკავშირებულ ნებისმიერ მოთხოვნაზე შემოიფარგლება იმ თანხით, რომელიც მოთხოვნის წარდგენამდე ბოლო 12 თვის განმავლობაში გადაგვიხადეთ. ჩვენ არ ვაგებთ პასუხს არაპირდაპირ ან თანმდევ ზიანზე, ასევე AI-ს მიერ გენერირებული ჩანაწერების საფუძველზე მიღებულ გადაწყვეტილებებზე.

8. მომსახურების შეწყვეტა

Merme-ს გამოყენების შეწყვეტა და ანგარიშის წაშლა ნებისმიერ დროს შეგიძლიათ პარამეტრებიდან; თუ ისეთი სამუშაო სივრცის ბილინგის მფლობელი ხართ, რომელსაც სხვა წევრებიც ჰყავს, ჯერ ეს როლი სხვა ადმინისტრატორს უნდა გადასცეთ. სამუშაო სივრცის წაშლისას მისი გამოუყენებელი საათები იკარგება. ჩვენ უფლება გვაქვს, შევაჩეროთ ან შევწყვიტოთ იმ ანგარიშების მოქმედება, რომლებითაც ეს პირობები ირღვევა (სადაც ეს გონივრულია, წინასწარი შეტყობინებით). მომსახურების შეწყვეტისას თქვენი მონაცემები იშლება კონფიდენციალურობის პოლიტიკის შესაბამისად.

9. პირობების ცვლილება

ჩვენ შეგვიძლია განვაახლოთ ეს პირობები; დოკუმენტის დასაწყისში მითითებული თარიღი ასახავს მიმდინარე ვერსიას. არსებითი ცვლილებების შესახებ ეცნობებათ მომხმარებლებს აპლიკაციაში ან ელფოსტით, ცვლილების ძალაში შესვლამდე სულ მცირე 14 დღით ადრე.

10. მოქმედი კანონმდებლობა

ამ პირობებზე ვრცელდება საქართველოს კანონმდებლობა. დავებს განიხილავენ ქ. თბილისის სასამართლოები, თუ მომხმარებელთა დაცვის იმპერატიული ნორმებით სხვა სასამართლო არ არის განსაზღვრული.

11. კონტაქტი

შპს მერმე, support@merme.ai.